Sugar production Rise 19% Till 15 jan.2015

દેશમાં ૧૫મી જાન્યુ.સુધીમાં ખાંડનું ઉત્પાદન ૧૯ ટકા વધ્યું

ઓક્ટોબરથી ૧૫ જાન્યુઆરી સુધીમાં કુલ ૧૦૩ લાખ ટન ખાંડનું ઉત્પાદન થયું

દેશમાં ચાલુ સિઝનમાં ૧૫મી જાન્યુઆરી સુધીમાં ખાંડનું ઉત્પાદન ૧૯ ટકા વધીને ૧૦૩ લાખ ટનનું થયું છે.શેરડીનાં વધુ પૂરવઠાને પગલે ઉત્પાદનમાં પણ વધારો નોંધાયો છે.

ઈન્ડિયન સુગર મિલ એસોસિયેશને જણાવ્યું હતું કે દેશમાં ૧૫મી જાન્યુઆરી સુધીમાં કુલ ૪૯૪ સુગર મિલો કાર્યરત છે અને તેમણે ૧૦૩ લાખ ટન ખાંડનું ઉત્પાદન કર્યું છે, જે ગત વર્ષે ૮૬.૫૦ લાખ ટન જ થયું હતું. ગત વર્ષે આ સમયે ૪૮૬ સુગર મિલો કાર્યરત હતી.

મહારાષ્ટ્રમાં ખાંડનું ઉત્પાદન ૧૫મી જાન્યુઆરી સુધીમાં ૪૩ લાખ ટન થયું છે, જે ગત વર્ષે ૩૧ લાખ ટન થયું હતું. ઈસ્માએ કહ્યું કે ચાલુ વર્ષે શેરડીનાં પૂરવઠામાં વધારો થવાને કારણે મોટા ભાગની મિલો પૂર્ણ સમય ચાલી રહી છે.

ઉત્તર પ્રદેશમાં ૧૫મી જાન્યુઆરી સુધીમાં ખાંડનું ૨૫ લાખ ટનનું ઉત્પાદન થયું છે, જે ગત વર્ષે ૧૯.૭૫ લાખ ટનનું થયું હતું. કર્ણાટકમાં ૧૭ લાખ ટનનું ઉત્પાદન થયું છે, જે ગત વર્ષ જેટલું જ છે.

ઈસ્માએ જણાવ્યું હતું  કે સિઝન પૂરી થવાને હજુ બેથી ત્રણ મહિના બાકી હોવાથી મુલો સરકાર દ્વારા રાહત પેકેજની આતુરતાથી રાહ જોઈ રહી છે. નીચા ભાવને કારણે ૧૫થી ૨૦ લાખ ટન ખાંડ નિકાસ થાય તે જરૃરી છે. કેન્દ્ર સરકાર દ્વારા નિકાસ સબસિડી આપવામાં નહીં આવે તો ગત વર્ષે માર્ચ સુધીમાં કુલ રૃા.૧૩,૦૦૦ કરોડ ખેડૂતોનાં ચૂકવવાનાં બાકી હતી, જે રકમ ચાલુ વર્ષે વધી જાય તેવો ડર છે.

(Date 17 Jan.2015)

Cement price Rise Rs.60 in last two month

સિમેન્ટમાં તેજી ઃ બે મહિનામાં રૃા.૬૦નો ઉછાળો

ગુજરાતમાં આજથી વધુ રૃા.૧૦નો વધારો થશે, પેટ્રોલિયમ પ્રોડક્ટનાં ભાવ ઘટી રહ્યાં હોવા છત્તા ઉત્પાદકોની કાર્ટેલનું પરિણામ

સિમેન્ટ બજારમાં લાલચોળ તેજી જોવા મળી રહી છે. ગુજરાત સહિત દેશમાં સિમન્ટની કમાન ગણ્યાં ગાંઠ્યાં ઉત્પાદકોનાં હાથમાં હોવાથી છેલ્લા બે મહિનામાં સરેરાશ ૫૦ કિલોની ગુણીદીઠ રૃા.૬૦નો ઉછાળો આવ્યો છે. ગુજરાતમાં આજથી (સોમવાર)થી સિમેન્ટનાં ભાવમાં વધુ રૃા.૧૦નો વધારો થઈ રહ્યો છે. સરકાર દ્વારા પણ કોઈ જ પગલા લેવામાં ન આવી રહ્યાં હોવાથી ભાવ એકધારા વધી રહ્યાં છે. બીજી તરફ બિલ્ડર લોબી ભાવવધારા સામે હવે વિરોધ નોંધાવે તેવી શક્યતા છે.

ગુજરાતમાં સિમેન્ટની એક થેલીનાં ભાવ દિવાળી સમયે ટ્રેડમાં રૃા.૨૪૦ અને નોન ટ્રેડ (જથ્થાબંધ) ભાવ રૃા.૨૨૦ની સપાટીએ હતા, જે હવે વધીને અનુક્રમે રૃા.૩૦૦ અને રૃા.૨૮૦ની ઊંચી સપાટીએ પહોંચી ગયાં છે. સિમેન્ટનાં ભાવવધારાનું કોઈ જ કારણ ન હોવા છત્તા બજારો ઊંચકાય રહી છે. ગુજરાતની સાથે સમગ્ર દેશમાં સિમેન્ટનાં ભાવમાં આટલો જ વધારો જોવા મળ્યો છે. દક્ષિણ ભારતમાં તો છેલ્લા એક જ મહિનામાં સિમેન્ટનાં ભાવમાં ગુણીએ રૃા.૭૦નો ઊછાળો આવ્યો છે.

બોમ્બે સિમેન્ટ સ્ટોકિસ્ટ અને ડિલર એસોસિયેશનનાં પ્રમુખ સંજય લાડીવાલાએ જણાવ્યું હતું કે સામાન્ય રીતે આ સમયગાળામાં લોજિસ્ટિગ સમસ્યાને કારણે સિમેન્ટનાં ભાવમાં ઉછાળો જોવા મળે છે. આ સમયગાળા દરમિયાન વેગનને કૃષિપાકોની હેરફેર માટે વધુ ફાળવવામાં આવતી હોવાથી સિમેન્ટને વેગન ઓછી મળે છે, પરિણામે દેશનાં કેટલાક વિસ્તારોમાં સિમેન્ટનો પૂરવઠો ઓછો મળે છે.

તેમણે વધુમાં કહ્યું કે જાન્યુઆરીથી માર્ચ મહિના દરમિયાન સિમેન્ટની માંગ પણ વધી શકે છે. અનેક પ્રકારનાં સરકારી કામો ખુલે છે અને નાણાકીય વર્ષ પુરૃ થાય એ પહેલા પૂર્ણ કરવાનો પણ લક્ષ્યાંક હોય છે જેને કારણે સરકારી પ્રોજેક્ટ માટે સિમેન્ટની માંગ વધે છે.

સિમેન્ટની ઉત્પાદનની પડતરમાં કોઈ જ વધારો થયો નથી. વૈશ્વિક બજારમાં ક્રૂડતેલનાં ભાવ છેલ્લા છ-સાત મહિનામાં ૬૦ ટકાથી વધુ ઘટી ગયા હોવાથી ભારતીય બજારમાં પણ પેટ્રોલિયમ-ઈંધણનાં ભાવ ઘટ્યાં છે. ટ્રાન્સપોર્ટેશન કોસ્ટ પણ ડીઝલનાં ભાવ ઘટાડાને કારણે ઘટી છે તેમ છત્તા ગુજરાતની બજારમાં સિમેન્ટનાં ભાવ વધારાનું કારણ ઉત્પાદકોની કાર્ટેલ સિવાય કંઈ જ લાગતું નથી તેમ એક અગ્રણી સિમેન્ટ ડિલરે જણાવ્યું હતું.

મુંબઈનાં લાડીવાલાએ વધુમાં કહ્યું કે દેશમાં અત્યારે સિમેન્ટ બજારમાં આશરે ૧૦૦૦ લાખ ટનની ઓવર કેપિસીટી છે અને જેટલી ઉત્પાદન ક્ષમતા છે તેનું ૬૮ ટકા જ ઉત્પાદન હાલ થઈ રહ્યું છે. આમ ઉત્પાદન ક્ષમતાં કરતાં ઓછું થતું હોવાથી અને માંગ વધવાને કારણે ઉત્તર ભારતમાં ભાવ હજુ પણ વધે તેવી ધારણાં છે. દેશમાં સરેરાશ ચાલુ વર્ષે સિમેન્ટની માંગ ૬થી ૬.૫ ટકા વચ્ચે વધે તેવી ધારણાં છે. કેટલાક સરકારી પ્રોજેક્ટનો મંજૂરી મળી છે,  પરંતુ તેની શરૃઆત હજુ થઈ નથી, જે આગામી દિવસોમાં થશે તો માંગ હજુ વધશે.પેટ્રોલિયમ પ્રોડક્ટ અને અન્ય કાચા માલનાં ભાવ ઘટ્યાં હોવાથી સરેરાશ સિમેન્ટ ઉત્પાદકોની ઉત્પાદન પડતર નીચી આવી છે, જેને કારણે સિમેન્ટ કંપનીઓનું માર્જિન પણ વધ્યું છે.

(Date 17 jan.2015)

Indias december oilmeal exports jump 107 mom

તેલીબિયાં ખોળની નિકાસ ડિસેમ્બરમાં નવેમ્બર કરતાં બમણી થઈ

એરંડા અને રાયડા ખોળની જંગી નિકાસથી સરેરાશ નિકાસનું ચીત્ર સુધર્યું

દેશમાંથી તેલીબિયાં ખોળની નિકાસમાં ફરી એક વાર વેગ આવ્યો છે. તેલીબિયાં ખોળની ડિસેમ્બર મહિનામાં નિકાસ આગલા મહિનાની તુલનાએ સરેરાશ બમણાથી પણ વધારે નોંધાય છે. ખાસ કરીને એરંડા અને રાયડા ખોળની નિકાસ વધતા કુલ નિકાસમાં વધારો જોવા મળ્યો છે.

સોલવન્ટ એક્સટ્રેકટર્સ એસોસિયેશન ઓફ ઈન્ડિયા દ્વારા આજે જાહેર કરવામાં આવેલા નિકાસના આંકડાઓ પ્રમાણે ડિસેમ્બર મહિનામાં કુલ ૩.૮૯ લાખ ટન તેલીબિયાં ખોળની નિકાસ થઈ છે, જે આગલા મહિને ૧.૮૮ લાખ ટન થઈ હતી. ગત વર્ષની તુલનાએ ડિસેમ્બરની નિકાસ ૩૪ ટકા ઘટી છે. ચાલુ નાણાકીય વર્ષનાં પ્રથમ નવ મહિનામાં નિકાસ ગત વર્ષની તુલનાએ ૪૨ ટકા ઘટી છે.

 સીના એક્ઝિક્યુટીવ ડિરેકટર ડો.બી.વી.મહેતાએ જણાવ્યું હતું કે, સોયાખોળની નિકાસમાં ડિસ્પેરિટીને કારણે ઘટી રહી છે, પરંતુ રાયડા ખોળ અને રાઈસબ્રાન ખોળની સારી માંગ છે. રાયડા ખોળની નિકાસ પ્રથમ નવ મહિનામાં ૩૧ ટકા વધી છે અને રાઈસબ્રાન ખોળની બમણી નિકાસ થઈ છે.

વૈશ્વિક બજારમાં રાયડા અને એરંડા ખોળનાં નિકાસ ભાવ સરેરાશ ડિસેમ્બર મહિનામાં વધ્યાં છે. રાયડાખોળની ડિસેમ્બરમાં સરેરાશ ૨૮૬ ડોલરથી નિકાસ થઈ છે, જે આગલા મહિને ૨૫૨ ડોલર હતાં. એરંડા ખોળમાં ૯ ડોલરનો વધારો થઈને ૧૩૬ ડોલરનાં ભાવ થયાં છે. સોયાખોળમાં ભાવ ઘટ્યાં છે.

પાલનપુરનાં એક નિકાસકારે જણાવ્યું હતું કે રાયડાખોળમાં નિકાસ માંગની સાથે કાચા માલની અછત હોવાથી પણ બજારો વધ્યાં છે.  નિકાસમાં અત્યારે કોરિયાની સારી માંગ હોવાથી ચાલુ મહિને પણ નિકાસ સારી જ રહે તેવી ધારણાં છે.

દેશમાંથી છેલ્લા બે મહિના દરમિયાન તેલીબિયા ખોળની નિકાસ ( ટનમાં)

ખોળનું નામ            નવેમ્બર             ડિસેમ્બર       ફેરફાર (ટકામાં)

સોયાખોળ              ૧૧૦૮૦૬        ૧૯૮૮૩૨    ૭૯.૪૪

રાયડાખોળ              ૩૯૧૩૩           ૧૨૯૭૦૭    ૨૩૧.૪૫

રાઈસબ્રાન              ૩૪૬૩૮           ૧૮૨૦૦      ---

એરંડાખોળ              ૩૬૬૭             ૪૮૦૭૨      ૧૨૧૦

કુલ નિકાસ      ૧૮૮૬૩૯      ૩૮૯૮૧૧      ૧૦૬.૬૪

(Date. 7 Jan.2015)

Gujarat Ravi Sowing 5 Janu.2015

ગુજરાતમાં વરિયાળું વાવેતર ૩૯ ટકા વધ્યું ઃ ઈસબગુલમાં પણ વધારો

-ગુજરાતમાં કુલ રવિ વાવેતર વિસ્તારમાં ૨૦ ટકાનો ઘટાડો

ગુજરાતમાં મોટા ભાગનું રવિ વાવેતર હવે પૂર્ણ થઈ ગયું છે અને ચાલુ વર્ષે સરેરાશ મોટા ભાગનાં મુખ્ય રવિ વાવેતરમાં ઘટાડો જોવા મળ્યો છે. જ્યારે બીજી તરફ વરિયાળીનું વાવેતર ગત વર્ષની તુલનાએ ૩૯ ટકા વધ્યું છે, જ્યારે ઈસબગુલનાં વાવેતરમાં પણ ૧૪ ટકાનો વધારો થયો છે.

ગુજરાત સરકારનાં સત્તાવાર આંકડાઓ પ્રમાણે ૫મી જાન્યુઆરી સુધીમાં કુલ રવિ વાવેતર વિસ્તારમાં ૨૦ ટકાનો ઘટાડો થયો છે.કુલ રવિ વાવેતર ૩૦ લાખ હેકટરને પાર થયું છે, જે ગત વર્ષે ૩૭.૨૪ લાખ હેકટરમાં થયું હતું. રાજ્યમાં જીરૃનું વાવેતર ૪૨ ટકા ઘટ્યું છે. જ્યારે ઘઉંનું વાવેતર ૨૩ ટકા ઘટ્યું છે.

ગુજરાતમાં શેરડી અને તમાકુનાં વાવેતર પણ ચાલુ વર્ષે વધારો થયો છે. શેરડીનું વાવેતર ચાલુ વર્ષે ૧.૭૧ લાખ હેકટરમાં થયું છે, જે ગત વર્ષે ૧.૩૨ લાખ હેકટરમાં થયું હતું. જ્યારે તમાકુનું વાવેતર ૧.૨૭ લાખ હેકટરમાં થયું છે, જે ગત વર્ષે ૯૨ હજાર હેકટરમાં જ થયું હતું.

(Date. 6 Jan.2015)

Brent Crude Price Drops Below $50 for 1st Time Since 2009

બ્રેન્ટ ક્રૂડ ૫૦ ડોલરની અંદર ઃ સપ્તાહમાં ૧૧ ટકાનો કડાકો

-વિશ્વમાં ચાલુ વર્ષે ૧૫ લાખ બેરલ પ્રતિ દિવસ સરપ્લસ સ્ટોકનો અંદાજ

-ક્રૂડતેલનાં ભાવ હજુ પણ ઘટે તેવી સંભાવનાં

ક્રૂડતેલમાં મંદી દિવસેને દિવસે વધુ વકરી રહી છે. વૈશ્વિક બજારમાં બ્રેન્ટ ક્રૂડતેલનાં ભાવ આજે ૨૦૦૯ બાદ પ્રથમવાર ૫૦ ડોલરની સાઈકોલોજિક સપાટીની અંદર પહોંચી ગયાં હતાં. બીજી તરફ ભારતનું આયાતી બાસ્કેટ ક્રૂડનાં ભાવ પણ ૫૦ ડોલરની અંદર ઉતરી ગયાં છે. જે છેલ્લા છ વર્ષમાં પ્રથમવાર જોવા મળ્યું છે.

વૈશ્વિક બજારમાં બ્રેન્ટ ક્રૂડતેલનાં ભાવ આજે ઈન્ટ્રા ડે ઘટીને ૪૯.૬૬ ડોલરની સપાટીએ પહોંચ્યાં હતાં, જે મે ૨૦૦૯ બાદની સૌથી નીચી સપાટી છે. છેલ્લા એક સપ્તાહમાં ક્રૂડતેલનાં ભાવમાં ૧૧ ટકાનો ઘટાડો જોવા મળ્યો છે. જ્યારે અમેરિકન ડબલ્યુટીઆઈ ક્રૂડતેલનાં ભાવ ચાર ટકા ઘટીને ૪૬.૮૩ ડોલરની સપાટીએ પહોંચ્યાં હતાં, જે એપ્રિલ ૨૦૦૯ બાદની સૌથી નીચી સપાટી બતાવે છે.

અમેરિકન રિસર્ચ સંસ્થા એસઈબીનાં ચીફ કોમોડિટી એનાલિસ્ટ બજાર્ને સ્ચીલદ્રોપે જણાવ્યું હતું કે વૈશ્વિક બજારમાં ચાલુ વર્ષે ૧૦થી ૧૫ લાખ બેરલ પ્રતિ દિવસનો સરપ્લસ સ્ટોક રહે તેવી ધારણાં છે. ઓપેકે ઓછી માંગને કારણે ઉત્પાદનમાં કાપ માટે દરમિયાનગિરી કરવાની જરૃર છે. જો આવું નહીં થાય તો ભાવમાં વધુ ઘટાડો જોવા મળશે.

તેમણે વધુમાં કહ્યું કે ક્રૂડતેલનાં ભાવ ઘટતા અમેરિકન શેલ ઉત્પાદન ઉપર પણ અસર પહોંચી છે. વર્તમાન સમયમાં ક્રૂડ કરતા શેલ ગેસની ઉત્પાદન પડતર ઊંચી થઈ ગઈ છે.

બ્રેન્ટ-નાયમેક્સનાં ભાવ સરખા થાય તેવી સંભાવનાં

ક્રૂડતેલનાં ટેકનિકલ એનાલિસ્ટોનું કહેવુું છે કે આગામી દિવસોમાં બ્રેન્ટ અને નાયમેક્સનાં ભાવ એક સરખા થાય તેવી પણ સંભાવનાં રહેલી છે. આજે બ્રેન્ટનું પ્રીમિયમ બે ડોલરનું રહ્યું હતું. વૈશ્વિક બજારમાં અત્યારે ક્રૂડતેલનાં ઉત્પાદન કે પૂરવઠો ખોરવાય તેવા કોઈ જ કારણો છે નહીં, જેને કારણે બ્રેન્ટનું પ્રીમિયમ ઘટી રહ્યું છે. બીજી તરફ અમેરિકામાં ક્રૂડતેલનું ઉત્પાદન સતત વધી રહ્યું હોવાથી નાયમેક્સનાં ભાવ ઝડપથી ઘટે તેવી સંભાવનાં છે.

ભારતીય આયાતી બાસ્કેટ ક્રૂડ ભાવ છ વર્ષનાં તળિયે

ભારતીય આયાતી ક્રૂડતેલનાં બાસ્કેટ ભાવ ઘટીને ૪૯.૨૨ ડોલરની સપાટીએ પહોંચ્યાં હતાં, જે એક દિવસ પહેલા ૫૧.૫૩ ડોલર હતાં. આયાતી બાસ્કેટ ક્રૂડતેલ ભાવ છ વર્ષમાં પ્રથમવાર ૫૦ ડોલરની અંદર પહોંચ્યાં છે.

ક્રૂડતેલનાં ભાવમાં ઘટાડો થવાને પગલે આગામી ૧૫ જાન્યુઆરીએ પેટ્રોલ-ડીઝલનાં ભાવમાં પણ ઘટાડો થાય તેવી સંભાવનાં છે. કેન્દ્ર સરકારે પહેલી જાન્યુઆરી ઈંધણ ઉપરની સેશ પ્રતિ લિટર રૃા.૨ વધારી હોવાથી ભાવ ઘટ્યાં નહોંતાં, પરંતુ ૧૫ જાન્યુઆરીએ પેટ્રોલ અને ડીઝલનાં ભાવમાં જરૃર ઘટાડો થાય તેવી સંભાવનાં દેખાય રહી છે.

સિટી ગ્રૂપે નેચરલ ગેસનાં ભાવનો અંદાજ ૨૦ ટકા ઘટાડ્યો

વૈશ્વિક બજારમાં ક્રૂડતેલનાં ભાવ ઘટતા નેચરલ ગેસનાં ભાવનો અંદાજ પણ વૈશ્વિક બેન્કો ઘટાડી રહી છે. અમેરિકા સ્થિત સિટીગ્રૂપે આજે નેચરલ ગેસનાં ભાવનો અંદાજ ચાલુ અને આગામી વર્ષે માટે સરેરાશ ૨૦ ટકા ઘટાડ્યો છે.

સિટીગ્રૂપે જણાવ્યું હતું કે ચાલુ વર્ષે નેચરલ ગેસનાં ભાવ સરેરાશ ૨.૭૦ ડોલર પ્રતિ મિલીયન બ્રિટીશ થર્મલ યુનિટ રહેશે, જે અગાઉ ૩.૭૦ ડોલર રહેવાની આગાહી કરી હતી. ૨૦૧૬માં નેચરલ ગેસનાં ભાવ ૩ ડોલર રહેશે, જે અગાઉ ૪.૨૦ ડોલર રહેવાની આગાહી કરી હતી. વિશ્વમાં ગેસનું ઉત્પાદન વધી રહ્યું હોવાથી ભાવમાં ઘટાડો કર્યો છે.

ઉલ્લેખનીય છેકે નેચરલ ગેસ ફેબ્રુઆરી વાયદો આજે ૨.૮૩ ડોલરની સપાટીએ પહોંચ્યો હતો. ગેસમાં ૩ ડોલરથી અંદરનાં ભાવ ડિસેમ્બર ૨૦૧૨ બાદ સૌ પ્રથમ વાર પહોંચ્યાં છે.
(Date. 7 Jan.2015)

Guargum-seed price down

ક્રૂડમાં કડાકાથી ગવારમાં પણ મંદી ઃ ગમની નિકાસ અટકવાની શક્યતાં

ગવારગમની નિકાસ ચાલુ વર્ષે ૫ લાખ ટન આસપાસ થવાનો અંદાજ

ક્રૂડતેલનાં ભાવ આજે ઘટીને ૫૦ ડોલરની અંદર પહોંચી જતા ગવારમાં ફરી એક વાર મંદીનો માહોલ જોવા મળી રહ્યો છે. ગવારસીડ અને ગવારગમનાં વાયદામાં આજે ઈન્ટ્રા ડે ચાર ટકા સુધીનો ઘટાડો જોવા મળ્યો હતો. જોકે ગવારમાં હાજરનાં ખેલાડીઓનું કહેવું છેકે ગવારમાં હવે મોટી મંદી થાય તેવી સંભાવનાં ઓછી દેખાય રહી છે. બીજી તરફ ગમની નિકાસ ચાલુ વર્ષે ઓછી રહે તેવી સંભાવનાં છે.

ઓલ ઈન્ડિયા ગવારગમ મેન્યુફેકચર્સ એસોસિયેશનનાં પૂર્વ પ્રમુખ પુરષોત્તમ હિસારીયાએ જણાવ્યું હતું કે ગવારગમમાં નવા સોદા હવે અટકી જાય તેવી સંભાવનાં છે. જે પાઈપલાઈનમાં વેપારો છે તેની જ નિકાસ થઈ રહી છે. ક્રૂડતેલ ઘટતા માંગ ઘટી છે, જેને કારણે ચાલુ વર્ષે સરેરાશ ગવારગમની નિકાસ ૫ લાખ ટન કે તેનાંથી પણ ઓછી થાય તેવી શક્યતા નકારી શકાય તેમ નથી.

અપેડાનાં સત્તાવાર આંકડાઓ પ્રમાણે એપ્રિલથી સપ્ટેમ્બર દરમિયાન ગવારગમની કુલ ૩.૮૫ લાખ ટનની નિકાસ થઈ છે, જે ગત વર્ષે ૨.૭૬ લાખ ટન થઈ હતી. ઓક્ટોબરથી ડિસેમ્બરનાં ગાળામાં કુલ બીજી ૮૦ હજારથી એક લાખ ટન વચ્ચે નિકાસ થઈ હોવાનો ટ્રેડરોનો અંદાજ છે.

ગવારગસીડનાં જાન્યુ. વાયદામાં ઈન્ટ્રા ડે રૃા. ૧૬૦ ઘટીને રૃા.૪૪૪૬નાં ભાવ હતાં. ગવારગમનાં જાન્યુઆરી વાયદામાં ઈન્ટ્રા ડે રૃા.૪૮૦ ઘટીને રૃા.૧૧,૬૫૦ રહ્યાં હતાં.

ગંગાનગર-રાજસ્થાનનાં ગવારનાં એક અગ્રણી ટ્રેડરે કહ્યું કે ગવારમાં હવે હાજરમાં મંદી લાગતી નથી. દેશમાં ૧.૬૦ કરોડ ગુણીનાં પાક સામે ૯૫ લાખ ગુણી બજારમાં આવી ગઈ હોવાનો અંદાજ છે. જે બાકીનો માલ બચ્યો છે તેમાંથી ૧૫ ટકા આવક છેક નવી સિઝન સુધી આવશે નહીં. બાકી રહેલો માલ આખું વર્ષ ધીમી ગતિએ આવતો જશે. વળી હરિયાણાનાં સ્ટોકિસ્ટોએ રૃા.૫૫૦૦નાં ભાવથી પણ ગવાર ખરીદો છે, જે ગવાર હવે બજારમાં આવશે નહીં. રાજસ્થાનમાં ચાલુ વર્ષે સ્ટોક ઓછો છે.રાજસ્થાનમાં હનુમાનગઢ-ગંગાનગરમાં ૭૫ ટકા આવકો સંપન્ન થઈ ચૂકી છે. બીજી તરફ ગવારમાં ખેડૂતોની મજબૂત પક્કડ છે, જેને કારણે બજારમાં વર્તમાન ભાવથી મોટી મંદી લાગતી નથી.

તેમણે ક્રૂડની અસર વિશે કહ્યું કે ક્રૂડ ઘટી રહ્યું હોવાથી સેન્ટીમેન્ટ  ખરાબ થઈ રહ્યુ છે. ક્રૂડતેલનાં ભાવને ગવાર સાથે સીધો કોઈ સંબંધ નથી. ક્રૂડનું ઉત્પાદન તો વધી જ રહ્યું છે, પરિણામે ગવારગમની માંગ પણ ઘટતી નથી. ભાવ ઘટી રહ્યાં હોવાથી બજારનું સેન્ટમેન્ટ બગડી રહ્યું છે. આગામી પંદર દિવસ જો ગવારગમનાં નિકાસ સોદા થાય તો બજારને ટેકો મળશે અને જો સોદા ન થાય તો બજાર સ્થિર રહી શકે છે.
(Date. 6 Jan.2015)

India's October 1-Dec 31 sugar output up 27% y/y

દેશમાં ખાંડનું ઉત્પાદન ત્રણ મહિનામાં ૨૭ ટકા વધ્યું

યુ.પી.માં ૫૫ ટકા અને મહારાષ્ટ્રમાં ૪૭ ટકા ઉત્પાદન વધ્યું

દેશમાં ચાલુ સિઝનનાં પ્રથમ ત્રણ મહિનામાં ખાંડનાં ઉત્પાદનમાં ૨૭ ટકાનો વધારો નોંધાયો છે. ઈન્ડિયન સુગર મિલ એસોસિયેશન દ્વારા આજે જાહેર કરવામાં આવેલા આંકડાઓ પ્રમાણે દેશમાં ઓક્ટોબરથી ડિસેમ્બર દરમિયાન કુલ ૭૪.૬ લાખ ટન ખાંડનું ઉત્પાદન થયું છે, જે ગત વર્ષે ૫૮.૬ લાખ ટનનું થયું હતું.

ઈન્ડિયન સુગર મિલ એસોસિયેશને જણાવ્યું હતું કે દેશમાં ખાંડનું ઉત્પાદન વધ્યું છે, પરંતુ ભાવ તેની ઉત્પાદન પડતર કરતાં પણ નીચે પહોંચી જતા મિલો ખેડૂતોને શેરડીનાં પૈસા ચૂકવી શકે તેવી સ્થિતિમાં નથી.

એસોસિયેશને વધુમાં કહ્યું કે ઉત્તર પ્રદેશની મિલો ચાલુ વર્ષે ત્રણ સપ્તાહ વહેલી શરૃ થઈ છે, જેને કારણે ઉત્પાદનમાં વધારો જોવા મળી રહ્યો છે. વળી ખાંડની રિકવરી પણ ચાલુ વર્ષે ૯.૨૫ ટકા જોવા મળી છે, જે ગત વર્ષે ૮.૭૫ ટકા જોવા મળી હતી.

મહારાષ્ટ્રમાં ખાંડનું ઉત્પાદન ૪૭ ટકા વધીને ૩૨.૭ લાખ ટન થયું છે, જે ગત વર્ષે ૨૨.૩ લાખ ટન થયું હતું. ઉત્તર પ્રદેશમાં ઉત્પાદન ૫૫ ટકા વધીને ૧૭.૨ લાખ ટન થયું છે, જે ગત વર્ષે ૧૧.૧ લાખ ટન થયું હતું.

કર્ણાટકમાં ૧૨ લાખ ટનનું ઉત્પાદન થયું છે, જે ગત વર્ષે ૧૨.૩ લાખ ટન થયું હતું. તામિલનાડુંમાં ૬૫ હજાર ટન થયું છે, જે ગત વર્ષે ૧.૬૨ લાખ ટન થયું હતું. બિહારમાં ૧.૮૦ લાખ ટન થયું છે, જે ગતવર્ષે ૯૦ હજાર ટન થયું હતું.

દેશમાં ડિસેમ્બર અંત સુધીમાં કુલ ૪૮૧ મિલો ચાલુ થઈ છે, જે ગત વર્ષે ૪૮૫ મિલો ચાલુ થઈ હતી. ખાંડનાં ભાવ હાલ મહારાષ્ટ્રમાં રૃા.૨૪૫૦થી ૨૫૦૦, ઉત્તર પ્રદેશમાં રૃા.૨૬૦૦થી ૨૬૫૦ છે.